وجبه متكامله .. صينية السبانخ باللحمه المفرومه والبشاميل .. لذيييذه

السلام عليكم ورحمة الله وبركاته

باحب السبانخ بالطريقه دي قوي لاني عادة مش باكلها مطبوخه
ده غير انها تعتبر وجبه كامله
فيه الخضار والفيتامينات من السبانخ
النشويات من البشاميل
البروتين من اللحمه المفرومه
وياجمالها مع العيش الاسمر .. اممممممم
كفايه بقى لاحسن جعت وندخل في الطريقه

كيلو سبانخ مسلوقه في ميه مغليه 3 دقايق
ومتصفيه في مصفاه كويس قوي .. اضغطي عليها كويس

نحمر 3 -4 فصوص ثوم مفرومين ونضيف لهم السبانخ ونقلبها على نار عاليه لحد لما ميتها تنشف خااالص

يتحمر بصل مفروم كتيير ويضاف له اللحمه المفرومه والثوم المفروم ويتظبط الملح والفلفل والبهارت وتترك على نار هاديه تتعصج وتتحمر كويس

البشاميل نحضره
نحمر 4 معالق دقيق في 4 معالق زبده ونضيف لهم مره واحده كوباية حليب وكوباية شوربه (دافيين) ونقلب بسرعه بالمضرب السلك اليدوي
ومش هيكلكع باذن الله
وفي الاخر نضيف معلقتين جبنه رومي(تركي) مبشوره ونظبط الملح والفلفل

نقلب السبانخ مع اللحمه المعصجه مع ثلاث ارباع البشاميل
ونضعها في صينيه مدهونه زيت

ثم نضيف على الوجه باقي البشاميل
ونرش عليها جبنه موتزاريلا وجبنه رومي مبشوره
وندخلها الفرن من تحت لحد لما تتحمر
وبعدين تحت الشوايه لحد لما الجبنه تسيح

وتتقدم سخنه

بالف هنا وشفا

شكرا اختي على الموضوع
تسلمي
تحياتي:
_:...عاشقة التصميم...:_

» صينية البطاطا المكسيكية
» جلاش باللحمه المفرومه ( طريقه تقديم مختلفه )
» يخنه اللحمه بالسفن مع شوربه الشوفان وسلطه البطاطس والمكرونه وجبه كامله
» صينية خضار مشكلة بكويرات اللحم
» صينية الباذنجان في الفرن