بوفيه سلطات بالصوررررر

أولا: التومية:
أنا باعملها بالطريقة الدايت وبتكون طعمها حلو زى برة بالضبط
المكونات:
بطاطساية مسلوقة جدا جدا مع الإحتفاظ بمية السلق
ليمونتين كبار
3 فصوص توم كبيرة بيوريه (مفروم ناعم جدا)
خل - ملح
2 ملعقة زبادى كبيرة
4 ملعقة كبيرة مايونيز كبيرة

الطريقة :
دى بالذات شرحاها بالتفصيل لإنى عايزاكم كلكم تجربوها لو بتحبوا التومية زيى
- بتحطوا كل الحاجات اللى فاتت فى الخلاط وندور

بوفيه سلطات بالصوررررر 1265829318

- لو الخليط سميك نضيف حبة صغيرة من مية السلق ودة بيكون شكلها بعد الضرب

بوفيه سلطات بالصوررررر 1265829514

ودة الشكل النهائى:

بوفيه سلطات بالصوررررر 1265829777

- بصوا بقى أنا دايما باحتفظ بيها فى برطمان مغلق فى التلاجة زى المايونيز بالضبط وباسحب منه زى ماأنا عايزة بيقعد عندى بالأسابيع وما بيجرالوش حاجة وفى رمضان بيكون متجهز عندى من أول رمضان وباسحب منه الشهر كله
------------------------------------------------------------------------------------------------------------------------------------------------------
ثانيا: الكول سلو :
ودى بالذات شرحاها برضه بالتفصيل لإنى لاحظت إنها غاليه عالفاضى بالرغم إن هى سهله جدا تتعمل فى البيت عالأقل حتكون مضمونة

المكونات:
- نصف كرنب سلطة
- واحد جزرة متوسطة
- 3 ملاعق خل كبيرة
- 4 ملاعق كبيرة مايونيز
- ملح
- 4 ملاعق كبيرة سكر
- 2 ملعقة كبيرة زبادى

الطريقة:
- نقطع الكرنب ناعم لو بالكبة يبقى كويس قوى بس عالسرعة الأولى
قبل التقطيع :

بوفيه سلطات بالصوررررر 1265829986

بعد الفرم :

بوفيه سلطات بالصوررررر 1265830069

- نبشر الجزر ناعم ولو بمبشرة الكبة يبقى أجمل شوفوا كدة:
بوفيه سلطات بالصوررررر 1265830131

- نحط كل مكونات الصوص عى بعضه ولو بالخلاط بيكون متجانس أكتر
قبل الخلط :
بوفيه سلطات بالصوررررر 1265830235

بعد الخلط :
بوفيه سلطات بالصوررررر 1265830334

- نخلط الخضار بالصوص شوفوا كدة دة الشكل النهائى:

بوفيه سلطات بالصوررررر 1265830457

ملاحظات هامة جدا:
-ما تحاولوش تعملوا كمية كبيرة فى المرة الواحدة لإن طعم الكرنب بيتغير بعد يومين علشان كدة أنا إقترحت نصف كرنبة
- الجزر كميته بتكون أقل من الكرنب دايما لو أكتر بيكون لون الصوص برتقالى ودة مش مطلوب
------------------------------------------------------------------------------------------------------------------------------------------------------
ثالثا : الباذنجان :
المكونات
- باذنجاناية متقشرة و متقطعة مكعبات كبيرة
- فص توم مفروم خشن – ( 2 ملعقة خل +ملح+كمون+ 3ملعقة ماء)
- ملعقة جزر مبشور ناعم
- ملعقة بقدونس مفروم ناعم (فى الكبة)

الطريقة
- نحمر الباذنجان فى الزيت ونحطه على ورق يمتص الزيت
- نحمر التوم فى الزيت لغاية أما نشم ريحته يعنى مايتلونش
- ونطش عليه الخل بعد ما نحط عليه الميةبالخل بالملح والكمون زى الفتة يعنى
- نخلط الصوص بالخضار بتكون حلوة قوى ودة الشكل النهائى

بوفيه سلطات بالصوررررر 1265830537

------------------------------------------------------------------------------------------------------------------------------------------------------
رابعا : سلطة المكرونة بالتونة :
- 250 جرام مكرونة سوستة مسلوقة ومتصفية
- نصف حزمة بقدونس مفروم ناعم (يعنى فى الكبة برضه)
- 10 حبات زيتون إسود كبيرة متقطعة شرائح وطبعا أكيد أكيد منزوعة النوى
- فلفاية حمرا كبيرة متقطعة مكعبات
- علبة تونة قطع
- خل –ملح –زيت ذرة

الطريقة :
نخلط كله على بعضه وخلاص ودى بتكون صورتها ودى ما بتكونش سلطة دى بتكون صنف من أصناف المكرونة وجبة كاملة يعنى وبصراحة تغيير بدل الصلصة وكمان سهلة ولو بتحبوا التونة والزيتون بتكون جنان

بوفيه سلطات بالصوررررر 1265830619

------------------------------------------------------------------------------------------------------------------------------------------------------
خامسا :سلطة الفاصوليا الخضرا :
بصوا يا جماعة السلطة دى أنا واخداها من عضوات جميلات كتبوا عنها قبل كدة فى المنتدى وخصوصا موضوع التعامل مع البصل كنت بصراحة ماعرفوش بس كانت نتيجنه حلوة قوى زى المحلات وطبعا أنضف

المكونات:
- 250 جرام فاصوليا خضرا ويستحسن تكون طخينة يعنى مش عاملة رجيم
- 2 ملعقة كبيرة سكر
- ملح – خل-فلفل
- بصلة متوسطة متقطعة جوانح ننقعها شوية فى شوية مية مغلية وخل وشويه سكر صغيرة عشان نهدى شوية فى الطعم
- نصف فلفلة حمرا كبيرة متقطعة مكعبات

الطريقة :
- نسلق الفاصوليا وملح ونقطتين ليمون ونشطفها ونصفيها من مية السلق
- نجهز التتبيلة (ملح –خل –فلفل-سكر) ونحطهم عالفاصوليا والفلفل
- نصفى البصل من ميته ونقلبه مع الخضار
- وطبعا نسيبها شوية تتشرب ودى صورتها

بوفيه سلطات بالصوررررر 1265832742

------------------------------------------------------------------------------------------------------------------------------------------------------
سادسا :بابا غنوج :
أنا عارفة إن كلنا تقريبا بنعملها فى بيوتنا بس ساعات بننساها وفيه كمان بنات حلوين لسة متجوزين جداد وفيه بنات أحلى غاويين مطبخ فقلت نفكر بعض بيها ونفيد بيها العرايس الجداد زى حبيبتى الغالية الدكتورة دينا اللى ساعدتنى فى تصوير البوفيه

المكونات
- باذنجاناية كبيرة مشويه على صاجة البوتاجاز ومتقشرة بعد كدة
- ملعقة مبشورة ناعم جزر- ملعقة بقدونس مفروم ناعم فى الكبة ويمكن الأستغناء عنهم
- ليمونتان-خل –كمون –ملح-بابريكا إن وجد-زيت ذرة
- -ملعقتين طحينة كبار
- 3 فصوص توم مفروم ناعم بيوريه
الطريقة:

-نفرم الباذنجان ناعم فى الكبة (أنا باحرص إن يكون حجمها كبير)
وبعدين نخط المكونات كلها مع بعض بالشوكة بس الباذنجان لازم يكون فى الكبة عشان يكون متجانس
-وبعدين نضيف كله على بعضه ممكن نحتاج شوية مية صغيرين وخلاص
- على فكرة أنا باجهز كمية و باحتفظ بيه فى برطمان وباسحب منه لما باعوز وخصوصا فى رمضان بيعمل شغل كبير هوة والتومية وآدى الصورة

بوفيه سلطات بالصوررررر 1265832910

------------------------------------------------------------------------------------------------------------------------------------------------------
سابعا سلطة البطاطس :
طبعا من كلاسيكيات البيت المصرى بس حبيت أقولها برضه عشان نفكر بعض بيها

المكونات والطريقة:
بطاطس مسلوقة ومهروسة-ليمونة-خل-كمون –مسطردة-زيت ذرة-ملح
ونقلب كله على بعضه وممكن كمان نحط ملعقة تومية من اللى حضرناها قبل كدة بتكمل الطعم وبتحليه والصورة أهى للحلوين:

بوفيه سلطات بالصوررررر 1265833034

------------------------------------------------------------------------------------------------------------------------------------------------------

ثامنا الشطيطةبالتفصيل على طريقة ماما :
المكونات:
- 4 حبات طماطم مفرومة فى الكبة (مش معصورة) زى الصورة

بوفيه سلطات بالصوررررر 1265833430

- 1 بصلة مفرومة
- 3 فصوص توم مفروم ناعم
- 2 قرن فلفل حامى –ملح –فلفل
الطريقة :
نصفر البصلة فى الزيت لحد ما نشم ريحتها
نضيف الطماطم ونسيبها لحد ماتخش فى التسبيكة

بوفيه سلطات بالصوررررر 1265833509

وبعدين نضيف الفلفل والتوم نى فى نى ونغطى ونسيبها تتسبك خالص

بوفيه سلطات بالصوررررر 1265833556

ودة الشكل النهائى:

بوفيه سلطات بالصوررررر 1265833618

ودى صورة البوفيه كله من غير الشطيطة لأسباب لا داعى لذكرها

بوفيه سلطات بالصوررررر 1265833921

شكرا اختي على الموضوع
تسلمي
تحياتي:
_:...عاشقة التصميم...:_

زائر

جميلة جدا
تسلم ايدك

» كفته مشويه مع رز بالجزر متهنيه - بالصوررررر
» كوردون بلوووووووو خطوة خطوة بالصوررررر