بيتزا رووووووووووووعة

المقادير

نذوب باكو خميره فوريه جافه او معلقه واحده خميره بيره في ربع كوباية ميه دافيه (لا هي سخنه تموت الخميره ولا هي بارده توقف عملها لما تحطي فيها صبعك تكون دافيه وفي نفس الوقت تتحملي حرارتها)
ونضيف لها معلقة سكر ونتركهم في مكان دافي لحد لما ترتفع وتعمل رغاوي وده دليل ان الخميره فعاله

4 كوب دقيق - معلقه كبيره بكنج بودر - معلقه صغيره ملح ... يتخلطوا مع بعض في طبق كبير
نعمل حفره في نص الدقيق ونضيف الخميره المذابه ومعلقتين كبار زيت زيتون (ربع كوبايه)
ونبدأ نعجن العجينه باضافة كوباية ل كوباية ونصف حليب دافي حسب نوع الدقيق اوخليط من الحليب والماء

ننقل العجينه على الترابيزه ونعجنها كويس بالضغط عليها وتجميعها مره تانيه وهكذا وهي بتبقى بتلزق في الايد في الاول بس مع استمرار العجن هتبدأ تلم
وممكن ترشي رشات خفيفه دقيق اثناء العجن لحد لما تحصلي على عجينه مطاطيه ممكن فردها

وده شكلها

نحطها في طبق كبير ونرشها بالدقيق من فوق وتحت او ندهنها زيت وتتغطى بفوطه نظيفه

نتركها ساعه تتخمر في مكان دافي لحد لما ترتفع

وده شكلها بعد التخمير

اثناء التخمير نبدأ نجهز التوبينج ...

الصلصه

معلقة صغيره ثوم مفروم تتحمر مع معلقتين زيت زيتون بدون ما يتحرق الثوم ولا يتغير لونه ونضيف عليها 3 طماطم مقشرين ومفرومين ناعم ومعلقتين صلصه ونتركها على نار هاديه لحد لما الميه تنشف
في الاخر نضيف ملح ونقطتين خل ورشة سكر ورشة زعتر او ريحان او نعناع .... ساعات باضيف شبت او بقدونس خاصة لو بيتزا الجمبري او فواكه البحر

تقطيع الحشو

تقطعي فلفل شرايح كتييير و زيتون ثلاثه او اربعه وبسطرمه او سوسيس و نبشر الجبنه الرومي معلقتين وفصين ثوم نفرمهم ونحضر الجبنه الموتزاريلا

لو هاعملها بفواكه البحر باشوح الجمبري والسبيط في شوية ثوم وعصير ليمون او رشة سماق وملح واسيبهم على النار العاليه 5 دقايق لحد لما ميتهم تنشف

لو بالتونه بتصفيها من الميه او الزيت كويس قبل ما تستخدميها

نفرد العجينه بالنشابه .. المقدار ده بيعمل واحده كبيره تكفي الاسره كلها . نفردها بسمك متوسط لا هي رفيعه ولا تخينه

وننقلها على الصينيه تكون مدهونه زيت ونبدأ نفرد في الاول الصلصه
ثم رشة جبنه موتزاريلا علشان تمسك الحشو
ثم نرص البسطرمه والسوسيس او الجمبري او التونه والزيتون الثوم المفروم وعلى الوجه الفلفل الاخضر
وفي الاخر باقي الجبنه (باستخدم الكيس كله) ورشة خفيفه جبنه رومي

نتركها تخمر مره تانيه في مكان دافي لمدة نص ساعه او ساعه ... او في الثلاجه لتاني يوم

نسخن الفرن قبل ما نحط البيتزا على حراره عاليه 200 درجه
هي بتاخد عشر دقايق ربع ساعه بالكتير وقبل ما نخرجها نرش عليها زيت زيتون

نخرجها مباشرة من الفرن اول ما تتحمر ... وتكه صغيره بلاش تحمري الجبنه قوي .. مجرد ما تسيح وتاخد لون خفيف خرجيها
وغطيها بصينيه او غطا بنفس الحجم علشان تطرى من البخار الناتج منها

وده شكلها النهائي

نيجي بقى لاهم حاجه وهي المشاكل اللي بتقابلنا في البيتزا

1- البيتزا بتطلع معجنه بالرغم من ان الخميره والمقادير مظبوطه
الموضوع ده بيحصل لما بتتخمر فتره زياده عن الساعه ولو حصل اي ظرف خلاكي تأخري استخدام العجينه دخليها الفريزر علشان توقفي عمل الخميره ولما تحبي تعمليها خرجيها تفك في مكان دافي واستخدميها عادي
او ممكن تكون بسبب ان السايل في العجينه كتير عن الدقيق (العجينه سايبه)
او ان الخميره مش شغاله وماخمرتش كويس

2- البيتزا بتتحرق من تحت ومقرمشه من تحت فقط .. اما نوع الصينيه بيحرق الاكل او انك بتدهني زيت كتيييير قوي او ان فرنك عالي بزياده وفي الحاله دي ارفعي الصينيه على اعلى رف في الفرن

3- البيتزا ناشفه ... لو عجنتيها بميه فقط وفردتيها رفيع هتطلع كريسبي وناشفه فالحل انك تدخلي فيها حليب وتفرديها مش رفيع قوي
او ان الفرن هادي او حطيتي البيتزا قبل ما تشغلي الفرن وتسخنيه والحل انك تسخني الفرن قبلها على حراره عاليه

4- العجينه مش بترتفع .. مااختبرتيش الخميره الاول لان الخميره ممكن تكون بايظه او نوعها مش كويس
وافضل نوع الخميره البيره من عند المخابز او اكياس رحاب(مكتوب عليها خميره جافه نشطه)

وممكن لو الخميره اختبرتيها الاول ومتأكده منها تكون بسبب انك عجنتيها بميه بارده مش دافيه او ان الجو ساقع .. وفي الحاله دي ... تسخني الفرن لحد لما يبقى دافي وبعدين تطفيه وتدخلي فيه العجينه متغطيه بفوطه لحد لما ترتفع مره تانيه

5- التوبينج بينزل ميه على العجينه ويسبب انها تتعجبن ... اللي بيعمل ده استخدام الطماطم او اي خضار بينزل ميه .. الطماطم قبل ما تستخدميها شيلي البذور وحطيها في مصفاه بعد ما تقطعيها علشان تتخلصي من الميه عن نفسي مش باستخدم طماطم وباكتفي بالصلصه
والافضل لو هتستخدمي خضار زي السبانخ او الكوسه تشوحيه قبلها لحد لما ميته تنشف

شكرا اختي على الموضوع
تسلمي
تحياتي:
_:...عاشقة التصميم...:_

» فساتين رووووووووووووعة
» بيتزا تحفة بالصور
» من انارده شفيفك رووووووووووووعة
» بيتزا الجبن..
» بيتزا بالصور